Volkskool Bethal vir Christelike Onderwys
Sport
Sportdeelname word
aangemoedig. Al die algemene sportsoorte word deur die BCVO
ondersteun en kinders kan daarin presteer tot op nasionale vlak.
Riffies skakel by die
Oos-Transvaal streek in. Alhoewel ouers genoodsaak is om baie te
ry, geniet die kinders die ervaring om ander CVO leerlinge te
ontmoet en teen hulle deel te neem.
Riffies se
sportorganiseerder is deur die Raad aangewys en tans is dit
Suzette Ernst. Alle navrae i.v.m. sport kan via
Heidie aan Suzette gekommunikeer
word. Eposnavrae is baie welkom.
Datums waarop die
onderskeie sportsoorte plaasvind, is op die
kalender aangedui. In uitsonderlike
gevalle kan 'n datum skuif, maar dit sal, indien nodig, aan die
betrokke ouers deurgegee word.
Eerste kwartaal:
Die eerste kwartaal word aan atletiek afgestaan. Enige leerling
kan inskryf vir die huissport en die streeksdeelname. Die
huissport byeenkoms is nie verpligtend nie. Wanneer u kind aan
die streeksbyeenkoms deelneem en so presteer om in die
Suidstreek span opgeneem te word, sal die volgende deelname die
Oos-Transvaal byeenkoms wees. Die Suidstreek span se kleredrag
is gewoonlik net 'n rooi T-hemp en 'n blou/swart sportbroekie.
Indien u kind verder presteer om in die Oos-Transvaalspan
opgeneem te word, sal daar sportklere en ander toerusting bestel
kan word. Leerlinge in die Oos-Transvaalspan kwalifiseer om
nasionaal aan die BCVO-SA’s deel te neem.
Indien leerlinge wat
in streekspanne opgeneem is, om een of ander rede, sonder 'n
geldige verskoning, onttrek of oefeninge mis, kan die leerling
met tot 'n jaar van BCVO sport geskors word. Maak dus seker dat
die nodige oefeninge getrou bygewoon word.
Die
atletiekbyeenkomste word by die volgende plekke aangebied:
-
Huissport
Die Standerton Akademie bied die laaste twee jaar die
huissport privaat aan, terwyl die ander skole in die streek
deur Middelburg Privaat Akademie uitgenooi is.
-
Suidstreek
Die Suidstreekbyeenkoms word op rotasiebasis tussen die skole in
die streek aangebied, indien moontlik.
-
Oos-Transvaal
Hierdie byeenkoms word meestal by Gromar in Groblersdal
aangebied, aangesien hulle die fasiliteite beskikbaar het. Die
skole werk ook op rotasiebasis om die byeenkoms aan te bied.
-
BCVO SA Atletiek
Dit vind in Sasolburg by die DP De Villiers Stadion plaas.
Tweede kwartaal:
Die tweede kwartaal word vir netbal en rugby opsy gesit. Reg aan die begin van
die kwartaal vind 'n netbal en rugby rondomtalie plaas wat nie verpligtend is
nie.
Vervolgens is daar 'n netbal- en
rugby kliniek-en-proewe naweek (vanaf Donderdagmiddag tot Saterdag), waar die
leerlinge deur ervare netbal- en rugbyspelers afrigting ontvang tydens die
kliniek (Donderdag en Vrydag) en tydens die proewe (Saterdag) word van
onafhanklike keurders gebruik gemaak om die beste spanne saam te stel. Indien
leerlinge aan die proewe deelneem en wel in die Oos-Transvaal Netbal en
Rugbyspanne opgeneem word, word die res van die kwartaal se naweke aan oefeninge
afgestaan. Hierdie naweke is op die kalender aangedui. Alle rugby en netbal
oefeninge vind in Groblersdal plaas.
'n Vriendskaplike wedstryd teen
Noord-Transvaal is jaarliks geskeduleer. Dit wissel tans tussen Potgietersrus en
Groblersdal. Hierdie wedstryd is verpligtend.
'n Bondedag word ook geskeduleer. Dis soos 'n mini-Winterspele en al die skole
van die BCVO neem daaraan deel. Hierdie dag se wedstryde is ook verpligtend (vir
die A-spanne en soms vir die B-spanne). Die Bondedag vind plaas óf in
Groblersdal, óf in Lichtenburg. Die moontlikheid dat ander plekke vir die
aanbied van die Winterspele aangewys kan word, is groot. Die Bondedagwedstryde
het ook ten doel om Bokkieweek-spanne te keur.
Die Winterspele is die laaste Netbal- en Rugbywedstryde waaraan vir die jaar
deelgeneem word. Dit vind plaas die eerste naweek nadat die skool vir die
wintervakansie gesluit het. Gewoonlik die Donderdag tot Saterdag. Die
Winterspele vind afwisselend plaas OF in Groblersdal, OF in Lichtenburg, OF in
Orania OF by Vivo. Tydens Winterspele probeer die Bokkie-afrigters ook oefensessies inkry. Die
Bokkieweek word aangebied tydens die tweede week van die wintervakansie en 'n
oefenkamp vind plaas in die paar dae voor die Bokkieweek. Die Bokkieweek word
afwisselend in Kroonstad en Nylstroom aangebied. Let wel: Bokkieweek word nie
deur BCVO aangebied nie, maar word wel deur hulle ondersteun.
Derde kwartaal
Tydens die derde kwartaal word krieket, tennis, hokkie, landloop en skaak
aangebied. Hokkie en krieketproewe vind reeds vroeg in die kwartaal in
Groblersdal plaas. Die program vir oefentye en wedstryde word dan deurgegee.
Die datums van die onderskeie byeenkomste word ook op die
Kalender aangedui.
.jpg) |
Dis raadsaam om vroegtydig vir enige nasionale BCVO sportbyeenkoms
verblyfplek
te bespreek. |
Besoek gerus
ook die Sportkalender vir meer
inligting oor die Atletiekbeampte afrigtingskursus
en Die Paardekraal
byeenkoms
|
1 Johannes 5:12
Hy wat die Seun het, het die
lewe;
wie die Seun van God nie het nie,
het nie die lewe nie. |
 |
 |
